السلام عليكم ياخواني وياخواتي
كيفكم ..
انا اليوم جايبلكم قصه وان شاء الله تعجبكم يارب
تفضلووو القصه ..
عائله أبو فهد ( نوره 28 .. فهد 25 .. غاده 23 .. غدير 18 .. راكان 14 )
وأخوه
عائلة أبو مشعل ( مشعل 29 .. عبدالرحمن.. عبدالعزيز 28 .. ساره 23 .. شهد 10 )
ولا ننسى جدتهم الخير والبركه وخواتهم الجوهرة ودلال وأخوهم الجميل سعود
في بيت ابو فهد :
غاده وأمها جالسين يتقهوون , غاده : يمه أبوي وينه ؟ أم فهد: مدري عنه لا تسأليني تخيلي لقيته متصل أربع مرات عليها !
غاده: اف متى ؟
أم فهد: الصباح
(هم يتكلمون عن طليقة أبو فهد )
غاده : يالله أبي أفهم مو خلاص إنفصلوا وش يبون في بعض !
أم فهد : العتب مهوب عليها العتب على أبوك الشيب مالي رأسه ويسوي حركات مراهقين
أخذت غاده الريموت وقعدت تقلب في هالقنوات وبعدها طلعت لغرفتها ,, فتحت اللاب وشافت ساره تكلمها
ساره : غدوو صقيقتي الو
غاده : هلا ساره
ساره : بدري وينك لي ساعه أكلمك ؟
غاده : منيب حول الجهاز والله , ليش وش عندك ؟
ساره : كنت بقول لك سالفه بس عبدالعزيز يناديني , إذا خلص هالبثر بجيك
غاده : ( فز قلبها ) اوك
( طولت ساره ولا جت وأذن المغرب وقامت غاده تصلي )
في بيت ابو مشعل :
ايوه ما قلتي لي يأم مشعل وشلون زوجة مشعل عساها طيبه معكم ؟
أم مشعل : اي والله طيبه , ما تجي ويدها فاضيه
جارتها أم نمر : ايه كله من خير مشعل ,, طيب وعيالك التوأم ما فكرتي تخطبين لهم والا لازم تزوجينهم توأم بعد !
أم مشعل : لا وش توأمه لو تشوفين دحيم يقول معصي اتزوج توأم أنا وعبدالعزيز علشان يعرف شكل زوجتي
أم نمر : طيب ظنك لو تزوجوا توأم بيصيرون عيالهم نفس الشكل !> مفهيه
أم مشعل : والله مدري ,, عبدالرحمن ما يبي يتزوج من العائله وعبدالعزيز شايل فكرة الزواج من رأسه
طبعا السالفه وما فيها أن أم مشعل لما ولدت بعيالها عبدالعزيز وعبدالرحمن تعبت ونامت بالمستشفى يومين وكانت أم فهد بنفس الوقت معها بنتها نورة
عمرها 3 شهور فأخذت واحد من هالتوأم وأرضعته ولا كانوا يدروون من اللي خذته ولا فيه فرق بينهم يتشابهون كثير , والثاني خذته وحده من قرايبهم
ورضعته ,, بعد ما كبروا توهقوا فقالوا خلاص كلهم عيالك والاعمال بالنيات , وهي بالأصل أرضعت عبدالرحمن
.
في مزرعة جدهم كل جمعه يتجمعون ويتغدون فكان عبدالعزيز وعبدالرحمن يدخلون يسلمون على أمهم وخواتهم من الرضاعه " نوره, غاده , غدير"
عبدالعزيز ما كان يحس تجاه أم فهد أي إحساس بالعكس كان لما يسلم عليها يحس بشئ مقزز شئ غريب , بعكس عبدالرحمن يجي ركض ويحضنها
ويبوس راسها ويسلم على خواته ويسولف معهم ..
( عبدالعزيز وعبدالرحمن كانوا في غاية الوسامه طول وجسم حتى نفس السكسوكه بس عبدالعزيز كان أبيض شوي وأنحف من عبدالرحمن )
في كل جمعه كانت غاده تلبس أحلى شئ وتتعطر بأحلى عطر وكل جمعه ستايلها غير هي الوحيده اللي تحس أن عبدالعزيز مو أخوها
وعبدالعزيز حاس بنفس الشئ وكان يحب غاده حب جنوني ولا يقدر يعترف لأن حبهم ممنوع .
دخلوا عبدالرحمن وعبدالعزيز وما كان فيه أحد غريب عماتهم وأمهم وخواتهم وزوجة عمهم ابو فهد اللي هي أمهم من الرضاعه
أول ما دخل عبدالعزيز دارت عيونه على المجلس شاف غاده قال بنفسه :" حماره قصت شعرها " هي عرفت إنه أنصدم وضحكت
سلم على أمه وخواته نوره وغدير ولما جاء دور غاده حضنها وضغط على يدها وقال وحشتيني , كل مره عبدالعزيز يحضن غاده تحس بشعور غريب
كان عبدالعزيز يستغل هالأخوة والرضاعه وكان يمزح معها ويحضنها ويطقها ويلعب معها .
قعدوا يسولفون وكان عبدالعزيز جرئ جدا الفرق اللي يميزه عن عبدالرحمن هو الجرأه جلس عبدالعزيز بالوسط وقعد يسولف مع هذي ويمزح مع هذي
وعيونه وقلبه مع غاده قال : عندي لكم مفاجأه بس بشرط اللي يفرح بهالمفاجأه من قلب يجي يبوس خدي ( هو يدري إن غاده تموت في عمها سعود) قالوا كلهم : اوكى
قال عمي سعود الليله بيوصل من كندا
كلهم صرخوا بصوت عالي : وااااااااااااااااااااااااااو
قال يالله اللي فرح يجي يبوس خدي ,قاموا كلهم باسوا خده الا غاده , قال وانتي ياغاده قالت : واذا بيجي يعني ! الله يحيه بس ماني فرحانه ( غاده فيها عناد ولكاعه )
نوره : عزيز الساعه كم بيوصل عمي سعود ؟
عبدالعزيز : الساعه 7 المغرب
طلع عبدالعزيز وعبدالرحمن من المجلس علشان يتغدون , عبدالعزيز بدل ملابسه وطلع يتمشى على رجوله ومعاه الاي بود ويسمع لأبو نوره كثير
تعمد يمر من البنات ويغني أبي أعرف متى تسكن رياحك ~~ وأبي أعرفك غرورك هو متى يطلق صراحك
كان صوت عبدالعزيز أكثر من رائع وكأنه يتحدى أبو نوره , ردت عليه غاده بصوت عالي : حبيبي الأصدق الأكذب تعبت أوصل شواطئ طبعك الأعذب
جاء عمهم سعود من المطار الساعه 9 وكانوا كلهم متجمعين في المزرعه ينتظرونه , نزل عبدالرحمن ونزل سعود من السياره سلموا عليهم وتحمدوا له بالسلامه
طبعا سعود حاس أن بين غاده وعبدالعزيز شئ ومسوي الفطين ,قعد سعود يسأل البنات عن أحوالهم كيف الجامعه وكيف أحوالهم ألتفت على غاده وقال : غدوو
شخبارك ؟ أستحت وقالت : تمام بشوفتك , رد عليها وقال أجتهدي وتخرجي بس عريسك ينتظرك عندي شاب وسيم ورومنسي ويشبه هريتك روشان
طمر عبد العزيز من مكانه : أسمع غاده أختي وأعرف من اللي يناسبها هااهـ ضبط وضعك يا سعود وكلش الا خواتي .
أبتسمت غاده وقعدت تلعب بشعرها ,
إلتفتت دلال لسعود : سعود وش فيك بردان قال اي والله جميده الرياض صح هناك برد لكن بردكم يعور
قامت ساره وجابت لسعود فروة وقالت خذها " لبسها وكملوا سوالفهم , بعدها نادت أم فهد على العشاء دخلوا كلهم يتعشون والبنات راحوا يساعدون
الحريم جوا , بعد العشاء دخل سعود على أمه وجلس يسولف عليها وكل واحد أنشغل بشغله ,,
دخلت غاده المجلس وقعدت تكلم صاحبتها وكانت متحمسه وهي تسولف حست ببرد خذت فروة سعود ولبستها وغطت راسها , دخل عبدالعزيز المجلس
وشاف غاده حسبها سعود ويسمع وشوشة سوالف قال بنفسه " يالخبيث من تكلم ؟ جاء مسرع وحاول يمزح معه جاء من ورى ضم أكتافه بيدينه بقوه
وحاول ينومه على الأرض صرخت غاده بقووة آآآهـ
صرخت غاده آآهـ ووقفت , تلعثم عبدالعزيز : ما دريت والله أحسبك عمي سعود
دخل راكان أخو غاده الصغير عمره 14 وشافهم حس بقهر
لأنه مهب عاجبه وضع عبدالعزيز وعبدالرحمن يدخلون ويسلمون ويسولفون على خواته وهم مش محارم لهم وكان ضد هالشئ بس لأنه صغير ماله
سلّطه وكلام على أمـه وأبوه صرخ بوجه غاده وقال أطلعي من هنا ولا عاد أشوفك داخله هنا .
طلعت غاده من المجلس وعبدالعزيز لحق راكان وقال له : وش فيك عسى ما شر صاير من تالي تنفخ ؟ عصب راكان وقال مالك شغل ولو فيك خير
وتستحي أنت وأخوك ما دخلتوا على خواتي ! " مسك عبدالعزيز أكتاف راكان وقال له : إنت ناسي إننا أخوان ؟ والا تبي أذكرك ؟
جاوب راكان بعصبية :
من قال إننا إخوان أمي تقول مدري من أرضعت ولا أدري كم عدد الرضعات يعني شئ ماهو أكيد خلاص ما نبيكم إخواننا لا تحتكون ياخي
" لف عبدالعزيز بظهر راكان وطلعه من المجلس وقال لا عاد توطوط هنا ما بقى الا هي بزر طول ساقي وينافخ براا
غاده دخلت على البنات وهي مرتبكه ومبسوطه هاه وش تأكلون
غدير : ما أكلنا شئ يالقطوه كلي شئ ترمينه .. وأصلا أبوي يقول مشينا للبيت الساعه اللحين 11 وورانا بكره دوامات
غاده : يؤه بدري طيب ساره لا تنسين باكر الفطور عليك أنتي ومها توصوا فينا ( غاده سمعت صوت أمها أم فهد توشوش مع عمتها الجوهره أكبر عماتها
قربت غاده منهم وقالت : يمه وش تقولون قالت : ولا شئ وخري عني وبلا لقافه " طبعا أم فهد تعرف أن غاده ملقوفه وتحب تعرف كلش "
قامت غاده تترجى في أمها وش السالفه أنا سمعت أسمي تكرر مرتين قالت عمتها الجوهرة أنا بعلمك تخبرين اللي بزواج مشعل خطبتك لولدها ؟ قالت غاده :
أيوة وش فيها ؟ قالت ام فهد وبصوتها نبرة حزن : هونت عن الخطبه .
غاده : جد هونت ؟؟ قولي قسم ؟؟ يمه وين القبله ؟
ام فهد : وش فيك ؟
غاده : بسجد سجود الشكر , الحمد لله يارب الحمد لله , قاطعتها نوره : مالك نصيب يعني وش فيها لو كملتي الصفه معنا وصرنا شلة العوانس
صرخوا كل البنات : معاً يداً واحده فلتحيا العنوسه .
نادى أبو فهد يالله يا حريم سرينا , لبسوا عباياتهم وطلعوا والكل ركب سيارته وعيون غاده أول ما طلعت تناظر سياره عبدالعزيز وتقول بقلبها " وه لا خلا ولا عدم يارب "
وصلوا للبيت والكل نام لأنهم مرهقين من الصباح ..
في الجامعه كان الجو برد الصباح وكانت غاده لابسه بلوفر أبيض مرت من بنتين لزلز شكلهم كان جداً مقرف كانت وحده منهم مركبه بريسز والثانيه تأكل الساندويتش
وتمضغه لها وتحطه بفمها , صرخت غاده فيهم ولعنه وإذا بوليتم فأستتروا
ولا عبروها ويا لزلز ما يهزك ريح , ناظرت غاده قدامها إلا الشله متجمعين سلمت عليهم وطلعوا لمحاضراتهم
كانت غاده طول الوقت تفكر في عبدالعزيز وهل ممكن يصير أخوها أولا وكيف بيصير الوضع لو كان أخوها ! رددت بنفسها " يارب تجي عجوز من هي وإلا من هي وتقول أنه مب أخوي
يارب تطلع فيه وحمه في ظهره وتتذكرها أمي يارب أي شئ بس ما يكون أخوي والله بموت .
في بيت أبو مشعل :
كانوا متجمعين بعد المغرب أبو فهد وأبو مشعل وسعود وخواتهم دلال والجوهرة وأمهم , يقرب سعود من أمه ويبوس يدها ويجلس جنبها يمه ما ودك تخطبين لي ؟
خلاص دراسه وكملت والوظيفه جاهزة أنتظر وحده تجمع شتات الغربه وتحتويني أبي وحده مربربه تدفيني أبي فلبينيه تمسجني أي داهيه المهم أبي أنثى
تشاركني غرفتي " ضحكت أمه وقالت أبشر أنت أختارومن بكره أخطبها لك , قاطعهم أبو فهد شوف الهنوف بنت عمك تخرجت من الجامعه
رد سعود : الهنوف ! يآخي أحد قايل لك إني بباي ؟ الهنوف ما تنفع زواج هذي مشروع مسطره ناجح شف لي غيرها تكفى.
ضحكت دلال وهي تقول : زوجة سعود عندي جمال ودلع وأدب وفوق هذا كله نَفسها في الأكل أليم
طمر سعود من الفرحه : وين تعرفينها فيه هذي ؟ ردت دلال : لقيتها عارضه نفسها للزواج في مجلة ترغب بالزواج من سعودي وسيم
ويقدر الحياة الزوجيه ! وين بعرفها يعني أخت زوجي محمد أسمها جميله لكن أسم على مسمى كل شئ فيها جميل
سعود : جميله اللي في باب الحاره ؟ ههههه دلال : يا ظريف شايف جميله اللي في باب الحاره ذي ما تسوى ظفرها وخر بس
نزل عبدالعزيز من الدرج وهم جالسين بالصاله عيونه مورمه من النوم : مساء الخير وسلم على أعمامه وعماته وجلس جنب سعود وكان ينتظرسعود يمد له الفنجال
وقعد يدور بجيبه ناظر فيه سعود بإستغراب : خير ! قال لا بس بدور إثباتي وبعلمك إني سعودي وأشرب قهوتكم ضحك سعود : ما تستحي
صب القهوه أنت وإلا ناسي إني عمك ؟ رد عبدالعزيز :إلا عمي بس لا تنسى إني أكبر منك بشهرين ,سحبت دلال منهم القهوه : ما بعد صرنا حضارم وترمس القوه يدور
بيننا ,إبتسم سعود بخبث وقال : سمي يا بتاعة جميله وهو يغمز بعينه فجأه رن جواله أرتبك وقام من عندهم وطلع يكلم برا
... : آآدووه
سعود : وربي أحلى آدوه سمعتها بحياتي وه يناس
..... : كيفك ؟
سعود : تمام إلين قبل شوي , بس سمعت صوتك تعبت ومحتاج طبيب
.....: هههههههههههههههههههههه
سعود : ليش تضحكين ! سبحان الله أنتم اللي يتعب عندكم تضحكون منه وين الشهامه وين الخوف من الله
دخل عليه عبدالعزيز وهو كاتم الضحكه : لو تعرف الخوف من الله ما كلمت بنات الناس , طالع سعود فيه وهو مطير حواجبه ومعصب ويسوي حركه بيده يعني برا
رد عبدالعزيز : منيب طالع ولو سمحت أبيك بسالفه ,سعود وبحركه ذكيه : لو تموت يا عزوز ما سمعت صوتها هذي روان عين السيح , روان : قلبو شفيك من تحاكي ؟
سعود : أبد يا قلبي هذا عبدالعزيز ولد أخوي يقول يبي يسمع صوتك وقلت له معصي أنتي شئ خاص فيني
روان : أمممممم وش يبي بصوتي !
سعود : هههههههه ما يبي لها بيشوف من هاللي ساحره سعود ومأكله عقله وتفكيره .
روان : حياتوو مامي عندي بقفل وأرجع أكلمك شوي
سعود : سمي من عيوني وه يا بخت أمك فيك بس
" سعود بعد ما قفلت روان :أجل مامي هاه ! طلع جواله الثاني اللي روان ما تعرفه وأتصل عليها وحصله إنتظار ! طيب يا روانوه دواك عندي "
ألتفت سعود وما حصل عبدالعزيز قال بنفسه " فكه .
في بيت أبو فهد
كانت نوره نايمه على بطنها وتلعب بشعرها وهي تحمل فيلم عمر وسلمى من النت
دخلت عليها غاده : كويحه أمي تبيك
ردت نوره وهي معصبه : كويحتن تحشرك
إن شاء الله لين تعرفين أن الله حق عاجبك لونك يا زبدة لورباك تقلعي لا بالجوال على عينك " ضحكت غاده وهي تقرب من نوره : كم مره أسأل أمي وأقول لها وش كنتي
متوحمه عليه وأنتي حامل فيني مره تقول فيشار ومره تقول أبلع من الثلج
قاطعتها نوره وهي تقول : ومره بالعه كلوركس أقول برا من تالي صايرتن ماصله
غاده : لا حول غلط أتاكد لوني الجميل جاء من وين
نوره وهي تضحك : لا مو غلط من حليب الوالده حتى شوفي عبدالعزيز أبيض من دحوم علشان أمي أرضعته " رفعت غاده رأسها وهي تداري دموعها : ومن قال
إن عبدالعزيز أخونا أنا أحس أمي أرضعت عبدالرحمن .
نوره : وشلون عرفتي يا عجوز حزم الضامي ؟
غاده : ما عرفت ولا شئ أساساً أبي أعرف أمي ليش مسبله حليبها هههههههههه بصراحه بديت أشك أنها كاتبه عليه حليب دافئ سبيل
نوره وهي ترمي الجوال عليها : فيك خير قولي هالحكي لأمي يالفالحه وأذلفي جيبي جوالي بسرعه بسوي له إسعافات أوليه
فتحت أم فهد الباب عليهم : أنتبهت لها نوره وقعدت ترتب سريرها وتقول : غدو تعالي نطلع لأمي يحرام لها ساعه تنتظرنا " أم فهد وحاطه يدها على خصرها :
على هامان يا فرعون ؟ قدامي أشوف أنتي وياها
نوره : أبشري بس لحظه أجيب اللاب وأجي , دخلت عليهم نوره وكانت جدتها موجوده عندهم باست رأسها وجلست جنبها
جدتها وبكل براءة : أفتحي التلفزيون حق فهد أبي أشوفه وأسلم عليه مثل ذيك المره
نوره : ههههههههههههههههه وش تلفزيونه يالغاليه قصدك الكام , يؤ يمه لازم تواكبين العصر وتفهمين كل شئ بالكمبيوتر
قاطعتها غدير : حركات يعني جدتي بتسوي إيميل هههههههه
غاده : عاد بيكون توبيكها تسبدن تعاف ما تسمن هههههههه ضحكت نوره وهي تقول : لا لا كلن يحوش النار لقريصه
ناظرت غدير لجدتها : يمه ما ودك تسوين حركة الإنتصار بأصابعك وأصورك وأخليها رمزيتك ههههههههههههه وإلا نسوي لك تاتو على ساقك
غاده : ما يحتاج جدتي ساقها ناشفه والعروق اللي فيها أطلق تاتو , قاموا يضحكون البنات ضحك هستيري
أم فهد : ووجعه صدق ما تستحون , ما عليك منهم يا خالتي الله يخليك لنا .
رن تنبيه بماسنجر غاده
قالوا ترى مالك أمل في قربها لو يوم ( عبدالعزيز ) : مساء الخير يا نور الرياض كله
مهما يكون عندي شعور بنلتقي ( غاده ) : هلا وغلا وكراتين حلا
قالوا ترى مالك أمل في قربها لو يوم ( عبدالعزيز ) : مابي كراتين الحلا أبيك أنتي وبس , كيفك يا أغلى من وطى نجد ؟
مهما يكون عندي شعور بنلتقي ( غاده ) : بخير بس بردانه " تقولها بدلع
قالوا ترى مالك أمل في قربها لو يوم ( عبدالعزيز ) : يالبى قلبهم البردانين طيب ردي ع جوالك بكلمك
ردت غاده وهي تغني : برداااااان أنا تكفى أبحترق بدفا
عبدالعزيز : ما عاش ولا كان البرد يا بعدهم دفي نفسك وإلا شغلي التكييف أو الدفايه ( عبدالعزيز ما يمون عليها بس يدري أنها تحبه ويدري أنها داريه وحاسه بحبه )
غاده وهي مقهوره منه : كيفك وكيف عمي ووسعود وعبدالرحمن ؟
عبدالعزيز : ما أخبرك قليلة أصل باقي السواق والشغاله والجيران أسألي عنهم بعد !
غاده : عادي نسأل ليش لا كيف الجيران والسواق والشغاله وكيفك انت ؟
عبدالعزيز : هههههههههههههههههههههههههههه مجنونه يناس ترى ما تفوت علي حركاتك , كيف الدوام معك ؟
غاده : ماشي الحال متى أتخرج وأفتك جد كرهت نفسي
عبدالعزيز : وعلى أيش مستعجله ؟
غاده : أبي أتزوج وأستقر واجيب بيبي وأسميه عبدالعزيز عليك يخوي طبعا " تشد على أسنانها بخبث
عبدالعزيز : غااااااااااااااده أعقلي ترى حتى المزح بهالامور ما أحبه
غاده : وليش ما تحبه يعني تبي أقعد عانس طول عمري ؟
عبدالعزيز : أمممم لا لا تقعدين ولا شئ يا عمتي بس ما أبيك تتزوجين قبلي لأني بخطب الأسبوع الجاي أخت صديقي
غاده وهي خانقتها العبره : من جدك ؟
عبدالعزيز : أي جاد حتى أسألي أبوي وعمي أبو فهد هم بيخطبونها معي
غاده :
عبدالعزيز : آلو
عبدالعزيز : آلووووو غدو , وش فيك
غاده وهي تصيح : هلا ما فيني شئ بس بروح لأمي بالصاله
عبدالعزيز : تعالي يالشينه تضايقتي ؟ عموما هذا درس لك علشان ما تختبرين صبري وأنتي عارفه أني أحبك وما راح أتزوج طول عمري
غاده وهي تشاهق : يعني كنت تلعب في أعصابي ؟
عبدالعزيز : ايه
غاده : طيييييييييييييب , طوط طوط طوط ورجعت للصاله وجلست على جهازها
قالوا ترى مالك أمل في قربها لو يوم ( عبدالعزيز ) : تقفلين بوجهي زين يا غدو حسابك معي بعدين , وطلع من المسن
قعدت غاده تفكر " ياربي أنا ليش قفلت بوجهه هو يمزح معي صدق إني ما عندي أسلوب " قامت إتصلت عليه ولا رد أتصلت مره ومرتين وثلاث إلين رد : نعم
غاده وبكل دلع : زيزوووو عاقبني سوي اللي تبي بس لا تتركني ترى جد ما أبيك تخليني
عبدالعزيز وهو خاق : يا ويل قلبك يا عبدالعزيز الله لا يخليني إذا فكرت أخليك أو أستغني عنك
غاده : طيب ما قلت لي كيف الجيران والسواق هههههههه أمزح أمزح قصدي كيف الدوام ؟
عبدالعزيز حب يغيضها : تمام اليوم جتني وحده علشان قضيتها مسكينه رحمتها جد الكل ضدها وتبي تتطلق من زوجها المجرم
غاده : أيوة وش بعد ؟؟ ما ودك تتزوجها وتكسب أجر فيها !
عبدالعزيز : هههههههههه لا ما ينفع تدرين ليش ؟ لأنها مهيب حلوة مثلك ولا دلوعه مثلك ولا تعرف تقص شعرها بدون ما تعلمني
أم فهد وهي تصارخ : غاااااااده من تكلمين ؟ ووجع إن شاء الله حسبي الله على اللي أخترع الجوال
نوره وهي تعلك : تدرين يمه إن اللي أخترع الجوال ولا مره أستخدمه أم فهد وبكل جديه : إيه لاقيكم يلعب عليكم يهودي يبكم تموتون واحد ورى الثاني
نوره : لا يمه لأنه ما يتكلم ولا يسمع .
تجي غاده وترمي الجوال ع الكنب : حتى الجوال محسوب علي عيشه تقصر العمر
يدخل أبو فهد ويفسخ شماغه ويحطه على الكنب جنبه : شلونك يمه عساك بخير ,. ترد أمه : دامني أشوفكم أنا بخير
تركض غاده تجي بحضن أبوها : دادي بابي يبه " يضحك أبوها : هلا سمي أمري وش تبين ؟
غاده : يرضيك أمي تصارخ وتهاوش علشان كنت أكلم أخوي عبدالعزيز بالجوال ؟
أبو فهد وهو يعدل جلسته : وش تبين فيه ! غاده ووجهها كله علامه تعجب : ليش مو أخوي وش فيها لو كلمته
أبو فهد : يبوي يا غاده خلاص كبرتي لا عاد تكلمينه لا هو ولا عبدالرحمن صحيح أنتوا أخوان بس لا تشيلين الميانه
غدير : يبه ليش تشيل الميانه وبنفس الوقت تسلم عليه جد عائله متناقضه !
أم فهد : إنطمي يأم لسانين
نوره وهي تعطي جدتها دواء الضغط : وهي صادقه يمه يا نسلم عليهم أو ما نطلع لهم ونعتبرهم عيال عم أصلا مدري ليش كنتي حاسدتني لا أشرب حليبي
وكنتي توزعينه على اللي يسوى واللي ما يسوى
يرن جرس التلفون وتقوم ترد غاده : آلو
عمتها الجوهرة : هلا غدير ؟
غاده بدلع : لا غدووو
الجوهره : طيب هاتي أمي
غاده وهي تعطي السماعه لجدتها : ياربيه عمتي الجوهرة ناقصها شنب بس وتصير عمي الثالث
ترد نوره وهي ميته ضحك : ودي أعرف العيال منها والا من زوجها هههههههههههههههه
أم فهد : قليلات أدب أفهم فيكم وإلا ما أفهم عمتكم تسمع يا مال الماحي مقطعتكم الأنوثه .
تبوس غاده رأس أمها : يمه ضميني بقوة وإلا أنحرفت أم فهد وهي معصبه وفيها الضحكه : أنحرفي كود نفتك منك
نوره : أوووهووو مدام الانحراف عندكم بريال بنحرف معكم بس يبي لنا أحد فاهم علشان يوجهنا الوجهه الصحيحه
غدير : وأنا معكم تقاطعها أم فهد : ولا كلمه خربتوا دلوعتي صارت تقلدكم بكل شئ صيروا قدوتها
وسلامتكم
وان شاء الله اعجبتكم القصه ياررب
مع تحيات اخوكم
عبدالله
قصه جميله وغريبه بنفس الوقت تفضلووو بدخول ..
العرض العادي
